Ka Khasi Students' Union (KSU) South Central East Circle mynhynne ka sngi ka 16tarik, Nailar 2020,  ka la ioh ban pynlong ia ka jingialang thang tyngshop CAA ha iew Pynursla. Katei ka jingialang ka dei ha ka nongrim ban pynpaw ia ka jing pyrshah Jur ki sengbhalang ia ka katei ka aiñ ïatjakor CAA bad ban dawa pyntreikam mardor ruh ia ka ILP hapoh ka Jylla Meghalaya. 

Ha katei ka sngi la pyniaid ia ka jingialang da u Samla Ksan Thabah General Secretary ka KSU South Central East Circle, la ioh ka jingkren maitphang na u Samla Reebokstar Diengdoh, President ka South Khasi Hills Unit, Haba ai jingkren u tei u Samla rangbah u la iawer ia ki paradoh parasnam ban iatylli kawei khlem ka jingsngewiapher dong iapher thain, u tei u Samla u la takraiñ tyngeh ia ka  sorkar Jylla namar ka jingpynslem ban pyntreikam ia ka MRSSA bad ka jingbym pyntreikam hok ia ka Land transfer Act,1971 khamtam eh ka jing lehstieng ha kaba iadei bad ka ILP, shuh shuh u la ther tyngeh ia ka District Council namar ka jing ailad ia ki barjylla ban kamai spah laitluit ha Ri jong ngi haduh kin da nud ban shim kabu khlem salia shuh wat ban hiarthma ia ki trai Ri trai muluk, kat haduh  ban da khlad hashen u (L)Lurshai Hynniewta ha Ichamati ha ka 28tarik, Rymphang 2020 u ba dei u dkhot ba shitrhem ka KSU, u la byrthen ruh ia ka sorkar namar ki barjylla ki leh beaiñ katba ki mon hapoh ka Ri jong ngi, katba ia ngi ki trai jaka wat ban pynlong tang ia ki kynja jingialang kiba jaijai ruh ngi hap ban pan jingbit thik pa thik bad kaba kham sngewbitar ka long namar kine ki pulit sorkar bad ki magistrate ki pynthut pynwit beit mankapor ba pynlong jingialang ka seng KSU.

Na ka liang u Samla Ennocent Khongstia, President ka KSU South Central East Circle u la dawa ia ka sorkar bad ki paidbah ba ki dei ban peit pynman ia ki Skim kiba wan na ka sorkar kmie kum ka jingtrei Shispah sngi (MRNGGS) ne kita ki VAC kiba ju don ha manla kawei kawei ka shnong halor ka jingpyndonkam bakla ia ka kyntien rangbah/ Khlieh shnong da ka kyntien "sarpan" bad  Dorbar shnong da ka kyntien "Panchayat", ki kyntien ki bym iahap dur bsati bad ka shynshar Khadar jong ka jaidbynriew jong ngi. Katba u samla Reginal Thabah, Publicity Secretary ka FKJGP Cyntral Body haba ai jingkren ha katei ka sngi u la kynthoh jur  ia ka sorkar Jylla namar ka jingbym shimkhia jong ka halor ka issue ILP, bad kynthah jur ia ka jingleh shiliang khmat bad ka jingbym kheiñsnep satia ka sorkar India ia ngi ki ritpaid trai Ri trai Muluk hynrei ka kham kheiñkor ia kita ki poiwir ki ban wan na ri Bangladesh, bad u la ong ba ka por ka ladei ia ngi ba ngin iatylli mlon kawei ban pynkyndit bynriew  ia ki nongmihkhmat ka jylla jong ngi ruh ki bymlait ang hakmat ka sorkar Pdeng ha Delhi bad kitei ki nongmihkhmat kiba shet kylla ia ka jaidbynriew.

Ka jingkren pynkut la ioh na u Samla rangbah ka KSU, u Samla Donald V Thabah General Secretary ka KSU Sengkmie da ka jingpynsngew ia ka Jingma ka CAA bad ka dei ka aiñ ka ban pynjahklep shisyndon ia ngi kum ki ritpaid lada ngi ailad ban treikam pura hapoh ka Ri baieid jong ngi, kumta u kyntu jur ia ki bor Shnong bor raid bad Hima bapher bapher khnang kin shimkhia ban pyntreikam ia ka bor ka iktiar lajong khnang ban iada ia ngi kum ka jaidbynriew na ka jingwan tyllep kitei ki poiwir bad ha ka juh ka por ban ieng pyrshah ia ka jingwan iuhroit ka sorkar India lyngka ki aiñ Iatjakor kiba ktah ia Hok jong ngi ki trai Ri trai Muluk, u la pynkynmaw ba ki nongmihkhmat jong ngi kim nud ban saham hakhmat ka sorkar Pdeng bad kane ka pawshai ba kim don satia ka jingsngewkhia shisha ia ki paidbah ka Jylla kiba lathrang eh ban pynurlong noh ia katei ka aiñ ILP, katba ka KSU pat ka lah dep ban pynta ILP haduh Dehli namar ka jingsngewkhia ia ka jaidbynriew. Khatduh u tei u nongialam rangbah u la pynkynmaw ia ka Jylla Tripura kaba dei tang ma ka napdeng ki Jylla ka thaiñ Northeast kaba ki paidbah Bangladeshi ki nud ban mih shakhmat ban pynpaw ia ka jingkyrshan CAA, ha ka juh ka por u pynkynmaw ba dei katei ka Jylla kaba wat u syiem jong ka ruh u lashah knieh lut ka dukan paki jong u ha ka sorkar Tripura kaba la pyniaid da ki mynderri suda bad katei ka Jylla kadei kaba lashah tyllep ha ki mynderri bad ki trai shnong ki lakylla long ritpaid, katkum ka census u snem 2001 ka iathuh ki Mynderri ki tam haduh 80% ban ia ki trai shnong ka Tripura.

Shuwa ban pynkut ia katei ka jingialang ha katei ka sngi, na ka liang ki nongialam ka KSU South Central East Circle ki laioh ban Thang ia ki Tyngshong CAA bad ka sorkar NDA, bad la ioh ruh ban Pyrta paidbah pyrshah ia u bah Prestone Tynsong bad u Conrad Sangma ba ki dei ban hiar shuki noh lada kim lah ban pynioh ia ka ILP hapoh ka Jylla Meghalaya.