Hadien ba la wan ki jingud jingnam kiba bun na ki samla pule jong ka jylla ki ba pule haki laiñ (stream) bapher bapher haki jaka pule kiba don haka jylla Karnataka, da ka jingtrei shitom ka Khasi Students' Union (KSU) Bangalore unit ka la lah ban pynioh ia ki syrnod (certificate) bad kiwei kiwei pat ki kot ki sla (documents) kiba iadei bad ka jingpule ka jong ki, kiba ki la dei hok ban ioh naduh u snem 2020 hynrei namar ka jingleh sting bad jingleh khlieh shrieh jong ki nongpyniaid jong kitei ki jaka pule bad ka jingbymkitkhlieh jong ki nongpynioh college (agency) kala pynlong ia kumba 30 ngut tam ki khynnah naka jylla kiba pule haka jylla Karnataka ban shah shitom sep ei shim snem tam ka u snem kaba ki la lah ban trei lane bteng iaki jingpule ka jong ki shakhmat.

Ka seng ka kyntu iaki paradoh parasnam jong ka Bri u Hynñiewtrep ban long kiba husiar bad bishar bin pa bin iaki jaka pule haba ki thmu ban leit pule ha kino kino ki jaka pule shabar ka jylla khnang kin nym ngat ha kum kine ki apot ba kynduh ki samla pule ha kane ka kynti.

Ka seng lyngba kane ka kyrwoh ka maham tyngeh ba kan khyrwit da kaba tyngeh iaki agent/agencies kiba ju mlien ban pynngop iaki Samla pule ka Bri u Hynñiewtrep lyngba ki buit siañti ka jong ki ban pynrung admission haki jaka pule ki ba long artatien.