Ki Food Inspectors ki dei ban hiar jurip manla u bnai, kyntu ia ki paidbah ban husiar bha.

Ka Khasi Students' Union (KSU) Laitumkhrah Unit hadien bala ioh jingujor na ki paidbah namar ka ba la jur palat ka jingleh sih bad leh bym suid ñiew ki dukan dkhar bad ki hotel bapher bapher bad ki katto katne ki jaka bam ha Laitumkhrah. 

Kumta myn ha ka 12 tarik u ïaiong 2022 ki la leit jurip da lade bad la lap shisha ia ka jingleh sih ki bar jylla kaba ijli bad kaba lah ban ktah ia ka koit ka khiah ki paidbah. 

Kumta, ka Seng ha katei ka jing jurip ka la maham da kaba tyngeh ia kitei ki jaka bam ba kynthup ka Prakash hotel, Angel Hotel, Kalpatru, Naveen Sweets, Volgo, Pratima, Ashirwaad, Rajshree Sweets bad Foodies ba ki dei ban leh khuid leh suba bad lah bthah ruh ban khang shwa lashai ka sngi khnang ba kin pynkhuid pura bha ia ka jaka shet jaka khlieng bad la bthah ruh ba nangne shakhmat kin hap lehkhuid leh suba lym kumta lada ka ka Seng kan lap biang sa shisien kan shim da ka sienjam kaba tyngeh.

Khatduh ka kyrwoh jongka seng ka dawa ia ki food inspectors ban hiar jurip manla u bnai khnang ban lah teh lakam shisyndon ia ki jinglehsih ki jaka bam bapher bapher, shuh shuh na ka liang ka seng ka kyntu jur ia ki paidbah ban husiar bha shuwa ban leit bam ha ki dukan bar jylla khnang ban lait na kum kitei ki jaka bam ki bym shngaiñ satia ia ka koit ka khiah.